Navoiy innovatsiyalar universiteti va Chuvash davlat pedagogika
universiteti o‘rtasidagi hamkorlik istiqbollari
Navoiy innovatsiyalar universiteti rektori J.Yo.Mavlonov Rossiya Federatsiyasining Chuvashiya davlatiga xizmat safari doirasida I.Ya.Yakovlev nomidagi Chuvash davlat pedagogika universitetiga tashrif buyurdi.
Tashrif chog‘ida Chuvash davlat pedagogika universiteti rektori Igor Vladimirovich Kojanov, ilmiy va innovatsion ishlari bo‘yicha prorektor Vladimir Nikolayevich Ivanov hamda Akademik G.N.Volkov nomidagi Etnopedagogika ilmiy-tadqiqot instituti rahbari Mixeyeva Svetlana Lvovna bilan uchrashuv tashkil etildi.
Uchrashuv davomida universitetlar o‘rtasida etnopedagogika va etnopsixologiya yo‘nalishlari bo‘yicha ilmiy tadqiqotlar olib borish, talabalar almashinuvi dasturlarini yo‘lga qo‘yish, ilmiy anjumanlar hamda stajirovkalar tashkil etish kabi masalalar muhokama qilindi. Shuningdek, kelgusidagi istiqbolli loyihalar yuzasidan fikr almashildi.
Bundan tashqari, Navoiy innovatsiyalar universiteti rektori Chuvashiyadagi O‘zbek Milliy Markaziga tashrif buyurib, u yerda o‘zbek millati, madaniyati va qadriyatlariga bo‘lgan e’tibor va hurmat haqida o‘z taassurotlari bilan o‘rtoqlashdi. Mazkur tashrif universitetlar o‘rtasidagi ilmiy va madaniy aloqalarni yanada mustahkamlashga xizmat qilishi kutilmoqda.
